Компанийн тухай

Монгол улсын эрдэс баялаг эрчим хүчний салбарын 95 жилийн хөгжлийн түүхэн хуудсанд 2 дахь нүүрсний уурхай юм.

БНМАУ-ын Аж Үйлдвэрийн Яамны Сайдын 1955-01-31-ний 33 тоот тушаалаар анх Адуунчулууны нүүрсний далд уурхайг байгуулагдаж, 1955-04-05 ны өдөр далд уурхайн анхны амыг нээснээр жилдээ 2.0 мянган тонн нүүрс гаргах хүчин чадалтай далд уурхайг  ашиглалтанд оруулсан.

1968 оноос Чойбалсан хотод Дулааны цахилгаан станц байгуулагдахтай холбогдуулж Адуунчулууны нүүрсний далд уурхайд өргөтгөл шинэчлэлийн ажлыг ЗХУ-ын техник эдийн засгийн тусламжаар Зөвлөлтийн барилгачид, мэргэжилтэнгүүд ил уурхай, уурхайн барилга байгууламжуудыг барьж, жилдээ 200,0 мянган тонн нүүрс олборлох, 450,0 мянган шоо метр хөрс хуулах хүчин чадалтай ил уурхайг  1969 онд ашиглалтанд оруулсан.

1984 оноос уурхайн 2 дахь өргөтгөлийн ажил хийгдснээр жилдээ 600.0 мянган тонн нүүрс олборлох, 1,0 сая шоометр хөрс хуулах хүчин чадалтай болж төслийн хүчин чадлыг 1988 онд бүрэн эзэмшсэн. 

2000 оноос техникийн шинэчлэл хийгдснээр жилдээ 1,0 сая тонн нүүрс олборлох хүчин чадалтай болсон.

Адуунчулуун ордын хувьд Дорнод аймгийн төвөөс хойш  7 км зайд Хэрлэн сумын нутаг дэвсгэрт оршдог. Тус уурхай нь үүсгэн байгуулагдсан цагаасаа хойш аймгийн албан байгууллага аж ахуйн нэгж, айл өрхүүдийг түлшний хэрэгцээг бүрэн хангаж ажиллахаас гадна  “ДБЭХС” ХК-ийг эрчим хүчний нүүрсээр тасралтгүй ханган ажилласаар ирсэн. Адуунчулууны нүүрсний уурхай 62 жилийн хугацаанд 28.4 сая шоо метр хөрс хуулж, 14.9 сая тонн нүүрс олборлож, Чойбалсан хотын “ДБЭХС” ХК-нд 12.1 сая тонн эрчим хүчний нүүрсийг өөрийн тээврээр хүргэж нийлүүлсэн байна.           

Компанийн эрх барих дээд байгууллага нь Төлөөлөн удирдах зөвлөл ба компанийн гүйцэтгэх засаглалыг гүйцэтгэх захирал удирдан зохион байгуулдаг. Тус компанийн бүтэц нь Захиргаа, Санхүү, төлөвлөлт хангамж борлуулалтын хэлтэс, Уул технологийн хэлтэс , Уулын, Авто засварын, Цахилгаан сантехникийн гэсэн хэсгүүдтэй.  

Тус компани 2017 оны байдлаар 150 ажиллагсадтай, үйлдвэрлэлийн үндсэн 3 хэсэгтэй бөгөөд уулын ажлын ухаж ачих ажилд ЭКГ-4,6Б,  ЭКГ-5А маркийн 6 ширхэг экскаваторуудыг мөн  хөрс нүүрс тээвэрлэлтийн ажилд БНХАУ-д үйлдвэрлэгдсэн Дүн-Фэн, Пав, Хово маркийн 20-35 тонны даацтай 23 автосамовалуудыг,  өрөмдлөгийн ажилд СБР-160, СБВ-2М өрмийн машинуудыг, овоолго түрэлтийн ажилд ОХУ-д үйлдвэрлэгдсэн  Т-130, Т-170 маркийн 4 бульдозеруудыг зам арчилгааны ажилд JR-180 маркийн автогрейдер, овоолж ачих ажилд БНХАУ-д үйлдвэрлэгдсэн  ZL-50С, XGМ-953 III маркийн дугуйт ачигч зэрэг уул уурхайн машин механизмуудыг ашиглаж байна. 2015 онд Адуунчулууны нүүрсний уурхай түүхт 60 жилийн ойгоо ёслол төгөлдөр тэмдэглэн өнгөрүүлсэн. 2015 оны 5 дугаар сард  50 тоннын даацтай Minetruck маркын 3 автосамосвалыг Хятад улсаас худалдан авч, хөрс хуулалтын ажилд ашиглаж байна.